Rate Gossip, Rate news, Gossip Lanka News | RateGossip | Rate Gossip | Rate Gossip Official Web Site | Gossip Lanka

2019 May 06
4,038
Views

ශ්‍රී ලංකාවට එල්ල වූ මරාගෙන මැරෙන දරුණු ත්‍රස්තවාදී ප්‍රහාරය සම්බන්ධයෙන් විවිධ මත පළවෙමින් තිබේ. ජාතික සහ ජාත්‍යන්තර වශයෙන් පළවී තිබෙන මත ගණනාවකි. ඒ බොහොමයක් අදහස් තුළ ඉස්ලාම් රාජ්‍යය (අයි.එස්.) මේ ප්‍රහාර පසුපස සිටින බවට සඳහන් විය. ශ්‍රී ලංකාව වැනි වෙනත් රටකට කිසිදු හිරිහැරයක් නොකරන, මුස්ලිම් ජනතාව සමඟ වසර දහසක පමණ කාලයක් තිස්සේ සහජීවනයක් පවත්වාගෙන ආ රටක අහිංසක ජනතාව මහා ඛේදවාචකයක වින්දිතයන් බවට පත් කළේ මොන කරුමයකටදැයි කෙරෙන විමසුමට අයි.එස්. සංවිධානයෙන් පිළිතුරක් ලැබී තිබේ.

අයි.එස්. සංවිධානය මේ ප්‍රහාරයේ වගකීම සිද්ධියෙන් දින 02කට පසුව බාරගෙන තිබුණි. එයින් දින 09කට පමණ පසුව අයි.එස්. සංවිධානයේ නායකයා වශයෙන් හඳුන්වනු ලබන අබුබකර් අල් බැග්ඩෑඩි ලෝකය හමුවේ වීඩියෝ පණිවුඩයක් නිකුත් කරමින් ප්‍රකාශ කර ඇත්තේ සිරියාවේ බගුස්හිදී තම සහෝදරයන් මරුමුවට පත්වීමට පලිගැනීමක් ලෙස පාස්කු ඉරිදා ශ්‍රී ලංකාවේ ස්ථාන කිහිපයකට මරාගෙන මැරෙන ප්‍රහාර එල්ල කළ බවය. වසර 05කට පසුව වීඩියෝ පටයක් ඔස්සේ අයි.එස්. නායකයා පෙනී සිටීමද විශේෂ සිද්ධියකි. පසුගිය මාර්තු මාසයේදී සම්පූර්ණයෙන් පරාජයට පත්කර ඇතැයි ප්‍රකාශිත ලොව බලවත්ම ත්‍රස්ත සංවිධානය වශයෙන් සැලකුණු අයි.එස්. සටන් තවම අවසන් නැති බවටද තවත් බොහෝ ප්‍රහාර එල්ල වන බවටද අල් බැග්ඩෑඩිගේ ප්‍රකාශයේ සඳහන් වෙයි.

එහි ඉලක්කය ලංකාවම දැයි පැහැදිලි නැතත් ඇමෙරිකානු තානාපතිනියගෙන් සහ හිටපු පොලිස්පතිගෙන් ද ප්‍රකාශ වී ඇත්තේ ශ්‍රී ලංකාව තුළ ඉදිරියේදී තවත් ප්‍රහාර සිදුවීමට ඉඩ තිබෙන බවය. එපමණක් නොව අනතුර ගැන කාදිනල්තුමා ද ඊයේ අනතුරු ඇඟවීමක් කළේය. මේ අනතුරු ඇඟවීම් සුළුවෙන් බැහැර කළ නොහැකිය. සකල ප්‍රහාරවල මහමොළකරු දිගටම පහරදෙන බව සඳහන් වෛරී ප්‍රකාශ ලොව පුරා ප්‍රචාරය කරන අතර ඇමෙරිකානු තානාපතිනිය සහ හිටපු පොලිස්පතිවරයා ශ්‍රී ලංකාවට තිබෙන අවදානම ප්‍රකාශ කිරීමේදී එයට ලොකු බරක් තැබීම අවශ්‍යය. ඉන්දියාවේ ඔත්තු සේවා මගින් කල් ඇතිව සපයන ලද සියලු_ තොරතුරු ඇතුළත් අනතුරු ඇඟවීම් ලියකියැවිලිවලට අත්වූ ඉරණම මේ ප්‍රකාශවලට ද අත්කර දුන්නොත් එය අපේ වළ අපම කපා ගැනීමකි. ඒ ගැන උපරිම අවධානය යොමුකිරීම ආණ්ඩුවේ ප්‍රමුඛම කාර්යය විය යුතුය.

සිරියාවේදී අල් බැග්ඩෑඩිගේ අය මරාදැම්මේ ශ්‍රී ලාංකිකයන් නොවේ. සිරියාවට ශ්‍රී ලංකාවේ යන්තම් හෝ සබඳතා ඇත්නම් ඒ මෙරටින් එරටට ගොස් සිටින ශ්‍රමිකයන් පිරිස සහ ජාත්‍යන්තර වෙළෙඳ ගනුදෙනු සුළු ප්‍රමාණයක් පමණි. සිරියානු හමුදාවට හෝ අල් බැග්ඩෑඩිගේ අය එරට දී සුන්නත්දූලි කර දැමීමට සටන් කළ වෙනත් කණ්ඩායම්වලට හෝ මේ රටේ කිසිවකුත් සම්බන්ධව සිටියේ නැත. අයි.එස්. සංවිධානය දිගින් දිගටම සිදුකරන දීර්ඝකාලීන යුද්ධයේ පළිගැනීම්වලදී බටහිර රටවලට ප්‍රහාර එල්ල කරන බවද අයි.එස්. නායකයා කියා තිබිණි. එහෙත් ශ්‍රී ලංකාව ඔවුන්ගේ පළිගැනීමේ කේන්ද්‍රස්ථාන වන බටහිර හෝ යුරෝපා රටක් නොවේ. එසේ නම් අයි.එස්. නායකයන් ශ්‍රී ලංකාවම මේ පළිගැනීමේ ප්‍රහාරයක් සඳහා තෝරාගත්තේ ඇයි? ශ්‍රී ලංකාව බටහිරට හෝ යුරෝපයට ගැතිකම් කරන රටක් වශයෙන් ඔවුන් සලකනවාද? මේ ප්‍රශ්නවලට නොපමාව පිළිතුරු සපයාගත යුතුය.

නිව්යෝක් නගරයේ පිහිටි ලෝක වෙළෙඳ මධ්‍යස්ථානයට 2001 වසරේ සැප්තැම්බර් මාසයේ 11 වැනිදා උදෑසන එල්ල වූ බිහිසුණු ත්‍රස්ත ප්‍රහාරය සිදුවන තුරු අමෙරිකාව සහ යුරෝපය ප්‍රමුඛ බලවත් රටවලට ත්‍රස්තවාදය යනු තුන්වැනි පන්තියේ රටවලට සීමා වූ “කරුමයක්” පමණක් විය. ඒ වනතුරු ඔවුන්ගේ ලොකුම මාතෘකාව වී තිබුණේ ත්‍රස්තවාදය හේතුවෙන් සිදුවන මානව හිමිකම් කඩවීම් පමණි. මහා බි්‍රතාන්‍යය ද අයි.ආර්.ඒ. ගරිල්ලන් සමඟ යුද වැදී සිටිය ද එය මරාගෙන මැරෙන ත්‍රස්තවාදයක් නොවීය. ඔවුන් බෝම්බ තැබුවේ මහජනතාවට කළ අනතරු ඇඟවීම්වලින් පසුවය. 

එහෙත් අයි.එස්. සංවිධානය ලන්ඩන් සහ පැරිස් ඉලක්ක කර ගනිමින් දරුණු ත්‍රස්ත ප්‍රහාර එල්ල කළ විට ඒ රටවල්වල නායකයෝ ද ත්‍රස්තවාදයේ සැබෑ මුහුණුවර හඳුනා ගත්හ. ලොව පුරා පැතිර යන ත්‍රස්තවාදයට එරෙහිව ප්‍රබල මත ගොඩනැංවුණු අතර ඒවා යළි නොසිදුවන සේ පියවර ගැනීම ද සිදුවිය. එසේ වුවත් තවමත් ඒ රටවල හුදෙකලා ත්‍රස්ත ප්‍රහාර සිදුවෙයි. අල් බැග්ඩෑඩි ප්‍රකාශ කරන්නේ ඒ ප්‍රහාර ඉදිරියේ දී වැඩිවනු ඇති බවය.

අන්තවාදී ඉස්ලාම් ත්‍රස්ත කල්ලි විසින් කරනු ලබන ප්‍රහාරවලට ගෝලීය ත්‍රස්තවාදී ලේබලය ගැසුණේ බලවත් රටවලට එල්ල වූ එකී ප්‍රහාර හේතුවෙනි. අපේ රට ද ආරක්ෂා කරගත යුත්තේ ගෝලීය ලේබලය ඇලවුණු නමුත් මෙරට ක්‍රියාත්මක අන්තවාදී කණ්ඩායම්වලිනි. ඒ සඳහා අන්තවාදී නොවන සියලු ඉස්ලාම් ආගමික මුස්ලිම් ජනතාවගේ සහාය වැඩි වැඩියෙන් අවශ්‍ය වෙයි. එසේම රටේ දේශපාලන නායකත්වයේ මගපෙන්වීම සහ කැපවීම ද ජනතාවගේ ආරක්ෂාව ප්‍රමුඛත්වයේලා සැලකීම ද අවශ්‍ය වෙයි. වරක් බි්‍රතාන්‍ය හිටපු අගමැතිනි මාග්‍රට් තැචර්ට අයි.ආර්.ඒ. ගරිල්ලන් විසින් ඇටවූ බෝම්බයකින් ඇය දිවි ගලවා ගත්තේ අනූ නවයෙනි. එවිට එම ගරිල්ලන් කියා තිබුණේ අප වාසනාවන්ත විය යුත්තේ එක් වතාවක් පමණක් වුවත් ඔබ හැමවිටම වාසනාවන්ත විය යුතු බවය. ශ්‍රී ලංකාවේ සියලු ජනතාව හැමවිටම වාසනාවන්ත කළ හැක්කේ රජයේ ක්‍රියාකාරී වීම තුළින් පමණි.

Make a Comment
Make a Comment
මෙන්න බලන්න තවත් ගොසිප්
LATEST GOSSIP
Top 10 Commenters
Latest Comments
 
Copyright © 2019 rategossip.com
Top